Hatorangan Jamita 3

Hatorangan tu Jamita Minggu, 31 Oktober 2010
Ev. Hesekiel 33:12-19+30-33 Ep. 2 Timoteus 2:1-7 S. Patik. Matius 7:21

Patujolo

31 Oktober 1517, gabe sada tikki na ringkot siingotonta sahat tu tingki on. Di huta Wittenberg, sahalak Imam Katolik na margoar Marthin Luther, mamungka sada gerakan di bagasan gereja. Di pagian ni ari gerakan on digoari sebagai Reformasi Gereja, na marujung tu mullop na kaum Protestan. Ngolu ni parugamaon di tingki i nunga lam tahis, maul (menjadi meleset) sian hasintongan ni Debata. Ulaon ni Huria di tingki i na manggadis surat hasesaon ni dosa (surat pengahpusan dosa) margugu tu pembangunan gereja Santo Petrus di huta Rom, mambahen gabe mambur (kabur) ruas i sian haporseaon na sintong i. Tubu ma pangajarion na mandok marhite surat hasesaon ni dosa na dituhor gabe dapotan hasesaon ni dosa ma joma i jala dipadame tu Debata. Haluaon na sian Debata dilapati:”Molo dipamasuk ho hepengmu tu poti pelean i, mangolu ma tondim di banua ginjang.”
Alani i, dibagasan gerakan Reformasi Gereja na i, Marthin Luther naeng paulakhon huria nang ruas i tu haporseaon na sintong. Adong 3 semboyan Reformasi Gereja na didok ibana: Sola Fide (hanya karena iman), Sola Gratia (hanya karena anugerah), Sola Scriptura (hanya karena Alkitab). Rimpunan na i ma: taruli hita di haluaon na sian Debata ndang alani usahanta, ndang alani hasintonganta, alai holan ala asi ni roha ni Debata na manghaholongi jala manesa saluhut dosa dohot pangalaosionta.
Di Minggu Reformasi on, marhite Buku Hesekiel, ditogihon do hita laho paimbaruon haporseaon dohot moralitas na adong dibagasan ngolunta, baik secara pribadi dohot tu masyarakat.

Situasi ni Surat

Panurirang Hesekiel rap tarbuang tu babel dohot Raja Joyakhim. Rap manaon na porsuk do ibana dohot bangsona di habuangan i. Dibereng ibana do parngoluon ni bangso i na lam holang sian Tuhan, nang pe mangae na porsuk nasida, ndang di pajonok tu Tuhan i. Nunga 5 taon lelengna nasida dibagasan habuangan, di si ma ro panjouon ni Debata tu ibana. Hesekiel lapatanna: “Debata mampargogoi” (Allah menguatkan), sada goar na gabe tanda tu bangso Israel bahwa Debata tongtong mamparrohaon nasida dibagasan hagogoton ni nasida. Na gabe mandele nasida di habuangan i alani na so habotoan do pe di sadia leleng nai nasida di Babel i. Hesekiel disuru manurirangi di tongatonga ni bangso, laho mansoarahon tu nasida asa mangolu di bagasan pangkirimon tu Debata. Debata sandiri na pabangkit ibana gabe “parjaga di pinompar ni Israel”. I do na gabe ulaonna di tongatonga ni bangso i di Babel.

Tafsiran Teks

Impola ni barita na di boan Hesekiel tu tonga-tonga ni bangso i, di bagasan perikop jamita on:
a. Tung na so tarpalua hatigoran ni halak partigor ibana di ari pangalaosionnai; Na nidokna di si: hatigoran ni halak partigor ndang paluahon, molo ibana muse mangulahon hajahaton, manang halak na tigor ndang dapotan hangoluan molo diujungna ibana mangulahon dosa. Agan pe (meskipun) di dok Debata:” Ingkon mangolu ibana!”, alai ndang gabe marhaposan tu hasintonganna i ibana jala gabe uhut mangulahon na so uhum. Sahalak na mangolu dibagasan hatigoran, mian ma dibagasan hatigoran na i. Ndang marlapatan hatigoran na taulahon di ngolunta molo huhut hita mangulahon hajahaton. Paruhuman ni Debata di ari parpudi ndang dirajumi marondolan tu godang ni hasintongan maralohon tibot (kesalahan) na taulahon di ngolunta. Ndang sarupa songon timbangan ni pengadilan ni portibi on timbangan ni Debata laho manontuhon uhum di ari parpudi. Haluaon ni hita jolma, merupakan silehonlehon ni Debata. Jadi marsigantung tu asi ni roha ni Tuhan na tahaporseai mangalehon haluaon i di hita.
b. Hajahaton ni halak parjahat pe ndang tagamon manginsombut tu ibana di ari hamumulakna tumadingkon hajahatonna i; Baliksa do on sian tu halak na mangolu dibagasan hatigoran, halak na mangolu dibagasan hajahaton pe boi do gabe malua molo olo ibana manadingkon hajahatonna i. Agan pe (meskipun) nunga didok Debata:”Ingkon mate do ho!”, hape mulak rohana tumadingkon dosana, jala diulahon uhum dohot hatigoran, i do na dapotan haluaon na sian Debata. Hamubaon i tarida sian pambahenanna na: dipaulak halak parjahat i singkoram jinalona i, tung disingkat do na nirampasna, tung diparangehon do angka patik ni hangoluan, unang mambahen hageduhon. Saluhut dosana ndang ingoton ni Debata be, songon hataNa marhite panurirang Yesaya 1:18b:”Dung i sai ro ma hamu, asa mardabudabu hita, ninna Jahowa. Tung sura rara dosamuna songon abit bunga dapdap, bontar do bahenonku songon itak; nang pe rara songon abit hasumba, gabe songon hapas do muse.” Digombarhon do tu hita Debata na marasi roha tu halak parjahat na tutu manolosoli dosana. Tudosanna boi tabereng sian pengalaman on i ma pembatalan ni uhum na sian Debata tu huta Ninive (Yunus 3:10).
c. Tingkos do dalan ni Tuhan i. Di hatorangan na dilehon Debata marhite si Hesekiel, di alusi bangso i do mandok:” Ndang tingkos dalan ni Tuhan i”. Alai baliksa, bangso i do “dalannasida sandiri tahe ndang tingkos!”. Dipillit Debata nasida gabe bangsoNa asa radotan ni nasida padan ni Debata, i pe asa gabe hasian ni Debata bangso i. Dungi manjadi harajaon malim ma nasida jala bangso na badia di Debata (2 Musa 19:5-6). Diajari bangso i mangolu dibagasan uhum ni Debata asa gabe sitiruon nasida tu sude bangso na di portibi on. Hape, ndang boi nasida mangolu dibagasan hatigoran i jala ndang boi nasida gabe bangso na badia. Patut ma diuhum Debata nasida marhite na masa habuangan tu Babel.
Di son ma dipatuduhon Debata asi ni rohaNa tu bangso i. Diginjang ni ayat on, i ma ayat 11, di pasahat Heseskiel do hata ni Debata:”Dok ma tu nasida: Songon sintongna mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel?” Tingkos do dalan ni Tuhan i tu bangso i, na sai mangalehon tikki tu bangso i asa marhamubaon.
d. Bangso i ndang mangulahon Hatani Debata. On ma sada kenyataan na tarida secara patar di tonga-tonga ni bangso i, na so olo jala na so hea mangulahon Hata ni Debata. Di tingki ro hata ni Debata tu bangso i, torop do nasida jala masipandohan nasida asa marpungu mambege “manang hata dia na ruar sian Jahowa!” (30). Alai holan na mambege ndang olo mangulahon. Di tikki ro angka naposo ni Debata pasahathon baritaNa, tudos do i songon suara ni parende na bage, na malo mamiltik parhinaloan, ditangitangi nasida do nian angka hata i, hape nanggo sahalak ndang anggo mangulahon (31-32). Nunga ro angka panurirang laho pasahathon dohot mangajarhon hata ni Debata tu nasida, alai ndang bukka roha nasida laho manjalo i. na jotjot terjadi i ma ndung salpo panurirang i, baru ma mangangguhi nasida mangido pangurupion asa ditogihon tu hasintongan dohot hatigoran ni Debata.

Pokok-pokok Sijamitahonon
1. Mangulahon na denggan ndang boi holan parsatongkinan, manang ndang holan sahali dungi ndang diulahon be. Naeng ma mangulahon na denggan di bagasan ngolunta ongabe sada hasomalan di ngolunta. Tajaga dirinta sian angka ulaon na jahat. Halak na boi manjaga dirina mian dibagasan ulaon na denggan, i do dapotan tumpal hangoluan i. Pangungkapon 2:10b:”Sai burju ma ho rasirasa mate; dung i lehononku ma tu ho tumpal hangoluan i!
2. Adong hata ni na pistar mandok:”Lebih baik terlambat, daripada tidak sama sekali”. Hata on bo i gabe nasehat tu hita na mangolu dibagasan hajahaton. Debata tongtong dibagasan serep ni rohaNa paimahon hamumulak ni parjahat i tumadingkon dalanna, gabe mangihuthon dalan ni Debata. Ndang adong hata “nunga tarlambat” laho paubahon ngolunta diadopan ni debata. Debata sandiri, nang pa nunga di dok tu parjahat i,” Ingkon mate do ho!”, alai molo olo manundalhon hajahaton i, tung na dapotan asi ni roha ni Debata do ibana.
3. Sada ayat na dipakke tokoh pendiri ni HchB/HKI di na pajongjonghon huria i, i ma Jakobus 1:22,”Alai gabe siulahon Hata i ma hamu, unang holan pananginangi, angka na paotootohon dirina!” On ma na sai ingkon marsaringar di ngolunta. Naeng ma hita balang (setia) jalo manongtong laho mangulaho Hatani Debata dibagasan ngolunta. “Lulu i hamu ma Jahowa, asa mangolu hamu!” (Amos 5:6), jala “Lulu i hamu ma na denggan, unang tagonan na jat i, asa mangolu hamu!” (Amos 5:14). Di ganup situasi ni ngolunta, hata ni Debata margogoihon hita, asal ma taulahon, unang holan ditangihon.

Hangoluan dohot Haluaonta Ro sian Asi ni Roha ni Debata
1. Marsihohot di bagasan ulaon na denggan
2. Sai ingot ma hita manolosoli dosanta
3. Sai Tangihon huhut ulaon hataNa